Wilaya ya Tabora

Tabora, Tanzania

Ramani ya mkoa wa Tabora ikionesha wilaya zote za mkoa huo

Wilaya ya Tabora ni miongoni mwa wilaya 7 zinazounda mkoa wa Tabora. Wilaya hii pia ndio makao makuu ya mkoa na Manispaa ya Tabora. Wilaya hii inapakana na wilaya ya Uyui kwa upande wa kaskazini, mashariki na Magharibi. Upande wa kusini inapakana na wilaya ya Sikonge.

Kwa mujibu wa sensa ya watu na makazi ya mwaka 2012, Manispaa ya Tabora ina jumla ya wakazi 226,999. Wanaume ni 111,361 na wanawake ni 115,638. Wenyeji wa wilaya hii ni wanyamwezi kama ilivyo kwa wilaya nyingine za mkoa wa Tabora. Pia kuna makabila mengine kama vile wasukuma, waha, waarabu, na wanyaturu.

Shughuli kubwa zinazofanywa na wakazi wa wilaya/manispaa ya Tabora ni kilimo, ufugaji pamoja na biashara. Mazao yanayozalishwa katika wilaya hii ni pamoja na Tumbaku, Pamba, alizeti, mahindi, mpunga na mtama. Wakazi wa wilaya hii pia wanajishughulisha na ufugaji wa nyuki wa asali.

Reli ya kati inapita katikati ya mji wa Tabora, makao makuu ya wilaya ya Tabora. Pia miundombinu za barabara zinazounganisha wilaya hiyo na wilaya nyingine za Tabora zinazidi kuboreshwa ikiwa ni pamoja na kujengwa kwa kiwango cha lami. Serikali imefanyakazi kubwa ya kuziwekea lami barabara nyingi za mitaani mjini Tabora, hali inayoupa muonekano mzuri zaidi mji wa Tabora.

Manispaa ya Tabora ina Hospitali moja (1) inayomilikiwa na serikali ya mkoa. Pia ina vituo vya afya na zahanati kadhaa zinazomilikwa na halmashauri, taasisi za serikali pamoja na mashirika ya kidini.

Kwa upande wa elimu, wilaya ya Tabora ina shule za msingi na sekondari. Baadhi ya shule za sekondari maarufu mjini Tabora ni shule ya sekondari ya wavulana (Tabora Boys) pamoja na shule ya wasichana (Tabora Girls). Pia kuna vyuo vinavyotoa elimu ya kati na ya juu. Miongoni mwa vyuo hivyo ni pamoja na Chuo cha Utumishi wa Umma, Chuo cha Ardhi, Chuo cha Kilimo Tumbi pamoja na Chuo Cha Ualimu. Pia kuna vyuo vingine vidogo vidogo vya VETA.

Taarifa hii imeandaliwa na mwandishi wetu, kama ina mapungufu au makosa tujulishe