Paul Makonda aanza ziara ya siku 10 ndani ya jiji la Dar Es Salaam

Dar Es Salaam, Tanzania

Mkuu wa mkoa wa Dar Es Salaam, Bw. Paul Makonda ameanza ziara yake ya siku kumi (10) ndani ya jiji la Dar Es Salaam.

Katika ziara hiyo, Bw. Makonda amelenga kusikiliza kero wanazokumbana nazo wakazi wa jiji la Dar Es Salaam ambapo leo ikiwa ni siku ya kwanza, ziara hiyo imeanzia Wilayani Kigamboni.

Mapema leo, mkuu huyo wa mkoa alizungumza na viongozi wa wilaya ya kigamboni kabla ya kuingia mitaani kuwasikiliza wananch juu ya kero wanazokumbana nazo. Akizungumza na viongozi hao, Makonda alisema ameamua kufanya ziara hiyo mahsusi kwa ajili ya kubaini kero za wananchi sambamba na kuwahamasisha watumishi wa serikali kuwatumikia wananchi.

"Nataka wafanyakazi wafanye kazi kwa bidii ili kwenda sambamba na kasi ya Rais wetu". Alisema Makonda.

"Nimegundua asilimia 80 ya wafanyakazi wa serikali hawafanyi kazi, asilimia 80 ya watumishi wa umma hawafanyi kazi, ni wapiga majungu, wasoma magazeti - ni wambea. kilichobaki ni kusubiri mwisho wa mwezi kwa ajili ya mshahara". Aliongeza Makonda.

Aidha, mkuu huyo wa mkoa aliwaambia viongozi kuwa hataki kufuatwa na wananchi wakitafuta msaada wa kutatua matatizo yao wakati chini yake kuna wasaidizi lukuki.

Katika ziara hiyo, Bw. Makonda alishuhudia uharibifu wa mazingira wilayani Kigamboni unaosababishwa na uchimbaji holela wa kokoto, hivyo alimtaka mkuu wa wilaya hiyo pamoja na vyombo vya ulinzi kuhakikisha wanashughulikiwa wale wote watakoonekana kuendelea kuchimba kokoto katika maeneo hayo.